రణబీర్ కపూర్, సాయిపల్లవి, యశ్ ప్రధాన పాత్రల్లో డైరెక్టర్ నితీష్ తివారీ తెరకెక్కించిన విజువల్ వండర్ ‘రామాయణ’ నవంబర్ 5న ప్రపంచవ్యాప్తంగా గ్రాండ్‌గా థియేటర్లలోకి వచ్చింది. అయితే ఈ సినిమా రిలీజ్ అయిన క్షణం నుంచే బాలీవుడ్ దర్శకుడు ఓం రౌత్‌కు మళ్లీ పాత పీడకల మొదలైంది. వెండితెరపై నితీష్ తివారీ రామాయణాన్ని ఆవిష్కరించిన తీరు చూసిన సినీ ప్రేమికులు, ముఖ్యంగా ప్రభాస్ అభిమానులు.. గతంలో వచ్చిన ‘ఆదిపురుష్’ను గుర్తు చేసుకుంటూ ఓం రౌత్‌ను సోషల్ మీడియా వేదికగా చీల్చి చెండాడుతున్నారు.
గతంలో పాన్ ఇండియా స్టార్ ప్రభాస్ హీరోగా, అత్యంత ప్రతిష్టాత్మకంగా భారీ బడ్జెట్ తో ‘ఆదిపురుష్’ చిత్రం ఓం రౌత్ తెరకెక్కించిన సంగతి తెలిసిందే. ఒక్క తిరుగులేని స్టార్ ఛాన్స్ ఇస్తే, ఆ సువర్ణావకాశాన్ని సద్వినియోగం చేసుకోవడం చేతకాక చిత్ర పరిశ్రమలోనే కనిపించకుండా పోయాడని నెటిజన్లు మండిపడుతున్నారు. భారతీయ ఇతిహాసమైన రామాయణాన్ని కలలో కూడా ఎవరూ ఊహించని విధంగా, నాణ్యత లేని నాసిరకం విజువల్స్, పరమ చెత్త వీఎఫ్ఎక్స్‌తో తెరపైకి తీసుకొచ్చి ఆయన చూపించిన నిర్వాకం అప్పట్లోనే తీవ్ర విమర్శలకు దారితీసింది.
తాజాగా నితీష్ తివారీ తెరకెక్కించిన ‘రామాయణ’ వెండితెరపై అద్భుతంగా ఆవిష్కృతం కావడంతో.. ఓం రౌత్ ప్రతిభను ఈ సినిమాతో ముడిపెడుతూ డార్లింగ్ ఫ్యాన్స్ ఆయన్ను మామూలుగా ట్రోల్స్ చేయలేదు. ఒక పవిత్రమైన కథను ఎలా తీయాలో, విజువల్స్ ఎలా ఉండాలో నితీష్ తివారీని చూసి నేర్చుకోవాలని హితవు పలుకుతున్నారు. చేతిలో అంత పెద్ద స్టార్ ఉండి కూడా రామాయణాన్ని అపహాస్యం చేసి, ఇప్పుడు ఎక్కడా నోరు మెదపకుండా పత్తా లేకుండా పోయాడంటూ నెటిజన్లు ఓం రౌత్‌కు మూడు చెరువుల నీళ్లు తాగుతున్నారు. ప్రస్తుతం సోషల్ మీడియాలో ఓం రౌత్‌పై జరుగుతున్న ట్రోలింగ్ హాట్ టాపిక్‌గా మారింది.
