Table of Contents
అంతర్జాతీయ పరిణామాల నేపథ్యంలో కేంద్ర ప్రభుత్వం ఇంధన ఎగుమతులపై కీలక నిర్ణయం తీసుకుంది. డీజిల్, విమాన ఇంధనం (ATF) ఎగుమతులపై విండ్‌ఫాల్ గెయిన్స్ ట్యాక్స్‌ను పెంచగా.. పెట్రోల్ ఎగుమతులపై విధిస్తున్న పన్నును పూర్తిగా తొలగించింది. అక్టోబర్ 31 అమల్లోకి వచ్చే ఈ కొత్త పన్ను తదుపరి 15 రోజుల పాటు కొనసాగనుంది. కేంద్ర ఆర్థిక శాఖ శనివారం ఈ మేరకు ఉత్తర్వులు జారీ చేసింది.
తాజా నిర్ణయం ప్రకారం డీజిల్ ఎగుమతులపై విధించే స్పెషల్ అడిషనల్ ఎక్సైజ్ డ్యూటీ (SAED), రోడ్ అండ్ ఫ్రాస్ట్రక్చర్ సెస్ కలిపి లీటరుకు రూ.8.50 నుంచి రూ.11.50కి పెరిగింది. అంటే ఒక్క లీటరుపై రూ.3 అదనపు పన్ను విధించబడుతుంది. అలాగే విమాన ఇంధనం (ATF) ఎగుమతులపై పన్నును లీటరుకు రూ.10.50 నుంచి రూ.11కి పెంచారు. పెట్రోల్ మరోవైపు ఎగుమతులపై ఇప్పటివరకు ఉన్న లీటరుకు రూ.2.50 పన్నును సున్నాకు తగ్గించారు. దీంతో పెట్రోల్ ఎగుమతిదారులకు కొంత ఊరట లభించనుంది.
అంతర్జాతీయ పరిణామాలే కారణమా?
పశ్చిమాసియాలో యుద్ధ ఉద్రిక్తతలు పెరగడం, అంతర్జాతీయ మార్కెట్లో ముడిచమురు ధరల్లో మార్పులు చోటుచేసుకోవడంతో కేంద్రం ఈ నిర్ణయం తీసుకుంది. దేశీయ మార్కెట్లో ఇంధన లభ్యతను పెంచడం, ఎగుమతిదారులు అంతర్జాతీయ ధరల వ్యత్యాసాల వల్ల అధిక లాభాలు పొందకుండా నియంత్రించడం విండ్‌ఫాల్ ట్యాక్స్ ప్రధాన ఉద్దేశం. అయితే దేశీయంగా వినియోగించే పెట్రోల్, డీజిల్‌పై ప్రస్తుతం ఉన్న ఎక్సైజ్ సుంకాల్లో ఎలాంటి మార్పు లేదని కేంద్రం స్పష్టం చేసింది. ఈ నిర్ణయం నేరుగా దేశీయ ఇంధన ధరల పెంపును సూచించదని గమనించాలి.
